හමුදා ඇඳුම සහ උතුරේ ජනතාව

නව රජයක් බලයට පත්වීමෙන් පසුව රටේ රාජ්‍ය ආයතනයන්හි ප්‍රධාන තනතුරු වෙනස් වීම සාමාන්‍ය දෙයකි. එය ඒ ආකාරයටම පසුගිය දිනවල සිදුකෙරිණි. ආරක්ෂක අමාත්‍යාංශයේ ‍ලේකම්වරයා පමණක් වෙනස් වූ නමුත් අනෙකුත් තනතුරු වෙනස් වීමක් සිදු වූයේ නැත. එසේ තිබියදී ඉකුත් සිකුරාදා (20) යුද හමුදාවේ ප්‍රධාන තනතුර වූ හමුදාපති තනතුර වෙනස් විය. හමුදාපති ලුතිනන් ජෙනරාල් දයා රත්නායක මහතාගේ සේවා දිගුවක් සිදුනොවූ බැවින් ඒ මහතා විශ්‍රාම ගිය අතර නව හමුදාපතිවරයා ලෙස ලුතිනන් ජෙනරාල් ක්‍රිෂාන්තද සිල්වා මහතා වැඩ භාරගනු ලැබිය. ඊට අමතරව උතුරු නැගෙනහිර හමුදා ඉහළ පුටුවලද වෙනස්කම් රැසක් සිදු කෙරිණි. යාපනය ආඥාපතිවරයා ලෙස කටයුතු කළ මේජර් ජෙනරාල් ජගත් අල්විස් මහතාගේ තනතුර සඳහා මේජර් ජෙනරාල් නන්දන උඩවත්ත මහතා පත් කෙරිණි. නැගෙනහිර ආඥාපතිවරයා ලෙස කටයුතු කළ මේජර් ජෙනරාල් ලාල් පෙරේරාගේ තනතුරට මේජර් ජෙනරාල් ජනක වල්ගම මහතා පත් කෙරිණ. මීට අමතරව වන්නි ආඥාපති ධුරයද තිබෙනුයේ වැට උඩය. වන්නි ආඥාපති තනතුර හොබවන මේජර් ජෙනරාල් බොනිෆස් පෙරේරා මහතාට කොළඹට කැඳවීමක් ලැබි ඇත.
 දැනගන්නට ලැබෙන පරිදි මේජර් ජෙනරාල් අමල් කරුණාසේකර මහතාගේ නම වන්නි ආඥාපති ධුරය සඳහා යෝජනා වී ඇත. කෙසේ නමුත් මුලතිව් ආඥාපති ධුරයේ වෙනසක් පිළිබඳව මතෛක් කිසිදු තොරතුරක් වාර්තා වී නැත. මේ වන විට මුලතිව් ආඥාපති ධුරය හොබවනුයේ මේජර් ජෙනරාල් ජගත් ඩයස් මහතාය. ජගත් ඩයස් මහතාගේ නම යුද හමුදා ප්‍රධාන මාණ්ඩලික තනතුර සඳහාද යෝජනා වී තිබේ. 
 ඉතිහාසය පිළිබව සොයා බැලුවහොත් දකින්නට ලැබෙන්නේ රජයක් වෙනස් වුවද ත්‍රිවිධ හමුදාවේ තනතුරු සඳහා එය බලපාන්නේ නැති බවකි. වැඩිම වුවහොත් හමුදාපති ධුරයේ පමණක් වෙනස්කම් සිදුවේ. නමුත් මේ වන විට එය ආඥාපතිවරුන් හා වෙනත් තනතුරු වෙනස් වීම දක්වා ව්‍යාප්ත වී ඇත. ඇතැම් විට ඉදිරියේදී එය සේනාධිපතිවරුන් බල සේනාධිපතිවරුන් දක්වා ව්‍යාප්ත වනු ඇත. එම තත්ත්වය රටක ආරක්ෂක ස්ථාවරත්වයට එතරම් හොඳ නැති බව බහුතර අදහසයි. විශේෂයෙන්ම යුද හමුදාව දේශපාලනීකරණය වීම වැඩි වශයෙන් සිදු වූයේ 2010 ජනාධිපතිවරණය සඳහා එවකට හිටපු හමුදාපති සරත් ෆොන්සේකා මහතා ඉදිරිපත්වීමත් සමගය. එවකට රජය රූපවාහිනියේ දේශපාලන වැඩසටහන සඳහා හමුදා ප්‍රධානීහු කැඳවනු ලැබිණ. ඒත් සමග එම හමුදා නිලධාරීන්ට දේශපාලන ‍ලේබල් ඇලවීමද ඉබේම සිදුවිය. නමුත් මේ කිසිදු නිලධාරියෙකු සිය කැමැත්තෙන් රජයේ දේශපාලන කටයුතු සඳහා දායක වූවා යැයි සිතිය නොහැක. 
 සාමාන්‍යයෙන් ත්‍රිවිධ හමුදාවට ඉහළින් අණදෙන සේනාධිනායක, ආරක්ෂක රාජ්‍ය ඇමැති, යන තනතුරු දේශපාලාන තනතුරු වේ. නමුත් ඔවුහු ගන්නා තීන්දු තීරණ ත්‍රිවිධ හමුදාව ක්‍රියාත්මක කළ යුතුය. එම නිසා මීට පෙර සිදුකළ හමුදාවේ පත්වීම් ලැබූවන් හා නව පත්වීම් ලැබුවන් දේශපාලන පත්වීම් ලාභීන් ලෙස නොසැලකිය යුතුය. එය යුද්ධයේදී දක්ෂතා පෙන්වන ලද හමුදා නිලධාරීන් හට කරන අසාධාරණයකි. 
මේ අතර මීට සති කිහිපයකට පෙර උතුරේ සංචාරයක නියැලුණු ආරක්ෂක රාජ්‍ය ඇමැති රුවන් විජේවර්ධන මහතා ප්‍රකාශ කළේ උතුරේ පිහිටි කිසිදු ආරක්ෂක හමුදා කඳවුරක් ඉවත් නොකරන බවකි. අමාත්‍යවරයාගේ ප්‍රකාශයෙන් සති දෙකක් ගත වන විට කඳවුරු හා මුර‍පොළවල් කිහිපයක්ම ඉවත් කිරීම ඉකුත් 19 හා 20දා සිදුවිය. වව්නියා මන්නාරම මාර්ගයේ පුවරසන්කුලම් හි පිහිටි විශේෂ කාර්ය බළකා කඳවුර පසු ගිය 19දා එම ස්ථානයෙන් ඉවත් කෙරුණි. එහි රාජකාරි කළ සෙබළුන් හා නිලධාරීහු ආසන්නයේ පිහිටි විශේෂ කාර්ය බළකා කඳවුරකට ස්ථානගත කෙරිණි. 
 එලෙසම මාන්කුලම් ප්‍රදේශයේ පිහිටි කුඩා ‍පොලිස් මුර‍පොළවල් හයක්ද ඉවත් කෙරිණි. එයින් මුර‍පොළවල් 04ක් වව්නියාව දිස්ත්‍රික්කයටද දෙකක් මුලතිව් දිස්ත්‍රික්කයටද අයත් වේ. තවද වව්නියාව දිස්ත්‍රික්කයට අයත් තවත් කුඩා ප්‍රමාණයේ හමුදා කඳවුරු දෙකක් ඉදිරි සතිය  තුළදී ඉවත් කෙරන බවටද තොරතුරු වාර්තාවේ. යුද්ධය අවසන් වී වසර 06ක් පමණ ගත වී ඇති නිසාත් එල්.ටී.ටී.ඊ. සංවිධානය ක්‍රියාත්මක වන බවට  තොරතුරු නොමැති නිසාත් ‍පොලිස් හා හමුදා කඳවුරු ඉවත් කිරීම සාධාරණ බවට කෙනෙකුට තර්ක කළ හැකිය. දෙමළ ජාතික සන්ධානයේ තර්කය වී ඇත්තේ උතුරුකරේ ජන ජීවිතය පවත්වාගෙන යාමේදී යුද හමුදාව දකින්නට ලැබිම දෙමළ ජනතාව බියට පත්වීමට හේතුවක් වී ඇති බවයි. උතුරේ සිටින ආරක්ෂක අංශ දෙමළ ජනතාවගේ නිදහසට බාධාවක් බවද කියා සිටී. එම නිසා උතුරුකරේ ස්ථාන ගතව සිටින ආරක්ෂ අංශ සාමාජිකයන් ඉවත් කරන ලෙසද රජයට බලකර කියා සිටියි. 
නමුත් සත්‍ය කතාව නම් හමුදා කඳවුරු තිබිමට ත්‍රස්තවාදය ක්‍රියාත්මක වීමට අවශ්‍ය නැත. එසේම  හමුදා ඇඳුමට දෙමළ ජනතාව බිය වීමට අවශ්‍යද නැත. නමුත් අවාසනාවකට දැන් දකින්නට ලැබෙන්නේ දෙමළ ජාතික සන්ධානයේ ඉල්ලීම් ඉෂ්ට වන ආකාරයකි. 
 මේ අතර ශ්‍රී ලංකාවට එරෙහිව එක්සත් ජාතීන්ගේ සංවිධානය සකස් කළ යුද අපරාධ චෝදනා වාර්තාව එළැඹෙන සැප්තැම්බර් මාසය දක්වා මාස හයකින් කල්දැමීමට එක්සත් ජාතීන්ගේ සංවිධානය තීරණය කළේය. මෙය එක්තරා අතකින් ශ්‍රී ලංකාව ලැබූ ජයග්‍රහනයකි. නමුත් මෙම තීරණයට දෙමළ ජාතික සන්ධානය ඇතුළු අන්තවාදී සංවිධානවල කැමැත්තක් නැත. ඔවුහු ඉකුත් සතියේදී උතුරේ ස්ථාන කිහිපයකම විරෝධතා ව්‍යාපාර හා උද්ඝෝෂණ පවත්වනු ලැබිය. මෙවැනි එක් විරෝධතා ව්‍යාපාරයක් ඉකුත් 21 (සෙනසුරාදා) යාපනයේදී පැවැත්විණි. දෙමළ ජාතික සන්ධාන පාර්ලිමේන්තු මන්ත්‍රී සුරේශ් ප්‍රේමචන්ද්‍රන් මහතා විසින් මෙය සංවිධානය කර තිබුණි. යාපනය බස් නැවතුම්‍පොළ අසලින් ආරම්භ වූ විරෝධතාව අවසන් වූයේ යාපනය විරසිංගම් ශාලාව අසලිනි. එහිදී විරෝධතාවය අවසන් වූයේ පඹයෙකු පුළුස්සා දැමීමෙනි. මීළඟ ප්‍රශ්නය වන්නේ විරෝධතාකරුවන් විසින් පුළුස්සා දමනු ලැබූ පඹයා කාගේ අනුරුවක්ද යන්නයි. 
 පුළුස්සනු ලැබූ පඹයාගේ හිස මුද්‍රිත විශාල ඡායාරූපයකින් සරසා තිබුනි. එම ඡායාරූපය වෙන කාගේවත් නොව දෙමළ ජාතික සන්ධානයේම පාර්ලිමේන්තු මන්ත්‍රී එම්.සුමන්තිරන් මහතාගේය. කුමන හේතුවකට පඹයාගේ හිසට සුමන්තිරන් මහතාගේ ඡායාරූපයක් යෙදුවේද යන්න පැහැදිලි නැත. ඇතැමෙකුගේ අදහස වී ඇත්තේ මෙවර නිදහස් උත්සවය සඳහා ආර්.සම්බන්දන් මහතා සමග සුමන්තිරන් මහතාද සහභාගි වූ නිසා පුළුස්සනු ලැබූ පඹයාට සුමන්තිරන් මහතාගේ ඡායාරූපයක් යොදන්නට ඇති බවයි. 
 මේ අතර වව්නියාව ප්‍රදේශය පුරා මහත් ආන්දෝලනයක් ඇති කරමින් සිදුවූ වෙඩි තැබිම සම්බන්ධයන් පුද්ගලයන් දෙදෙනකු ‍පොලීසිය විසින් අත්අඩංගුවට ගත්හ. පෙබරවාරි 04ට එළිවෙන ජාමයේ සිදුවූ වෙඩි තැබිමකින් ‍පොලිස් නිලධාරියෙකු තුවාල ලැබිය. සාමාන්‍ය තුවක්කුවකින් මෙම වෙඩි තැබිම සිදුකර තිබූ අතර එම සිදුවීම මහත් ආන්දෝලනයක් ඇති  කළේය. කෙසේ නමුත් පරීක්ෂණ පැවැත්වූ ‍පොලිස් කණ්ඩායම වෙඩි තැබිම සම්බන්ධයෙන් සැකකරුවන් දෙදෙනකු මෙරට නිෂ්පාදිත ගිනි අවියක්ද සමග සැකපිට අත්අඩංගුවට ගනු ලැබිය.  සැකකරුවන් දෙදෙනා දඩයක්කරුවන් බවද ‍පොලීසිය කියයි. 
 මේ අතර එල්.ටී.ටී.ඊ සංවිධානයේ හිටපු අවි සැපයුම්කරුවන කුමරන් පද්මනාදන් හෙවත් කේ.පී.සම්බන්ධයෙන් තීරණයක් ගැනීම නීතිපති විසින් මේ මස 26දා තෙක් කල් දැම්මේය. කේ.පී. අත්අඩංගුවට ගන්නා ලෙස පැමිණිල්ල ඉදිරිපත් කර තිබෙන්නේ ජනතා විමුක්ති පෙරමුණ විසිනි. කිලිනොච්චිය ප්‍රදේශයේ ක්‍රියාත්මක නර්ඩෝ (උතුරු නැගෙනහිර ආර්ථික සංවර්ධන සංවිධානය) ප්‍රධානියා වන්නෙ කේපි. මේ ලිපිය ලියන විටත් කේ.පී. වන්නියේ ඔහුට අයත් රාජ්‍ය නොවන සංවිධානයේ කටයුතු කරමින් සිටී. කෙසේ නමුත් කේ.පී. හිතවාදීන් කියනුයේ රජයට එරෙහිව ත්‍රස්තවාදි කටයුතුවල යෙදුණේ යැයි කියමින් කේ.පී.ට එරෙහිව නඩු පවරන්නේනම් 1988-89 භීෂණ සමයේදී රජයට එරෙහිව සටන් කරමින් රජයේ දේ‍පොළ විනාශ කළ ජ.වි.පෙ. නායකත්වයද අත්අඩංගුවට ගතයුතු බවයි. කෙසේ නමුත්, බහුතර දෙමළ ජනතාව තුළ කේ.පී. පිළිබඳව ප්‍රසාදයක් නැත. ඔවුහු කේ.පී.ව සලකනුයේ රජය සමග එක්ව කටයුතු කළ දෙමළ ජනතාවගේ ද්‍රෝහියෙකු  වශයෙනි. 
මේ අතර උතුරු මුහුදේ කෙරෙන කේරළ ගංජා ව්‍යාපාරය තවමත් සිදු කෙරෙන බවට තොරතුරු වාර්තාවේ. දකුණු ඉන්දියාවේදී  නිෂ්පාදනය කෙරෙන ගංජා ‍පෝක් සමුද්‍රසන්ධිය හරහා උතුරු වෙරළට රැගෙන විත් රට පුරා බෙදා හැරීම යුද්ධය අවසන් වීමත් සමග ආරම්භවිය. ඉකුත් වසරේදී මෙසේ රැගෙන ඒමට සූදානම් කළ ගංජා තොග රැසක් ඉන්දීය ‍පොලීසියේ අත්අඩංගුවට පත්වූ අතර ලංකාවට රැගෙන ආ ගංජා තොගද ‍පොලිස් අත්අඩංගුවට පත්විය. මෙම වැටලීම් වැඩි වීමත් සමග කේරළ ගංජා ජාවාරමේ යම් අඩුවීමක් දකින්නට ලැබුණද නැවතත් කේරළ ගංජා ජාවාරම ආරම්භ වී ඇති බවට තොරතුරු හෙළිවී ඇත. යාපනය පණ්ඩිතෙරෙප්පු ප්‍රදේශයේදී ඉකුත් 19 දා මෙලෙස රැගෙන එනු ලැබූ ගංජා කිලෝ 101ක් සමග සැකකරුවන් හතර දෙනෙකු ඉලවාලෙයි ‍පොලීසිය විසින් අත්අඩංගුවට ගනු ලැබිණ. උතුරු මුහුදේ කෙරෙන නීති විරෝධී රන් ජාවාරම්, හෙරොයින් ජාවාරම හා ගංජා ජාවාරම යන සියලු ජාවාරම් කෙරෙනුයේ ධීවර කර්මාන්තයට මුවා වී බව තොරතුරු හෙළිවී තිබේ. 
පසුගිය කාලයේදී අත්අඩංගුවට පත් සියලුම සැකකරුවන් ධීවරයින් ලෙස පෙනී සිටිමින් ජාවාරම්වල යෙදී සිටි බව සනාථ වී තිබේ. මේ හේතුව නිසා උතුරු වෙරළේ තෝරා ගත් ප්‍රදේශවල පදිංචි ධීවරයින් නාවික හමුදාව විසින් ලියාපදිංචි කිරීමේ ක්‍රියාවලියක් සිදුවේ. මෙම ලියාපදිංචි කිරීමේ කටයුත්ත නතර කර දමන ලෙස දෙමළ ජාතික සන්ධානයේ මන්ත්‍රීවරු දිගින් දිගටම ඉල්ලීම් ඉදිරිපත් කරති. එහිදී ඉදිරියෙන්ම සිටිනුයේ දෙමළ සන්ධාන මන්ත්‍රී සෙල්වම් අඩෙක්කලනාදන් මහතාය. මන්ත්‍රී අඩෙක්කලනාදන් මහතා මන්නාරමේ පදිංචි කරුවෙකු වන අතර ඔහුගේ ඥාති පරම්පරාවේ පිරිස්වල රැකියාව වී ඇත්තේ මහ පරිමාණයෙන් ධීවර කර්මානතයේ යෙදීමයි.