දින සියය දවසින් දවස ගෙවී යමින් රටේ ජනතාව තුළ බලාපොරොත්තු ඉහළ දැමූ තවත් සතියක් ගෙවී ගියේය. දින සියය තුළ රටේ ඇතිකරනවා යෑයි කියූ වෙනස්කම් හා ව්යවස්ථා සංශෝධන සිදුවනවා දැයි විමසමින් සොයමින් බලමින් විවරණය කරමින් හා පසසමින් රටේ ජනතාව කාලය ගෙවා දැමුවේ උණුසුම් දේශපාලන සිද්ධි සිදුවීම් ද සමුදායක් අතරය.
ජනාධිපති මෛත්රීපාල සිරිසේනගේ ප්රධානත්වයෙන් රජය ක්රියාත්මක වන අතර අග්රාමාත්ය රනිල් වික්රමසිංහගේ කාර්යභාරය ඒ තුළ සෑම පැත්තෙන්ම කැපී පෙනෙන්නට වූයේ ඔහු මෑතක සිට ඉතා ක්රියාශීලීව සිටිමින් විවෘතව අදහස් පළකරමින් එක්තරා අන්දමක විචාරශීලී පිළිවෙතක සිට කටයුතු කරන්නට පටන්ගෙන සිටි නිසාය. ඔහුගේ විවෘත හා වේගවත් අදහස් දැක්වීම් වෙනදාට වඩා ශක්තිමත් වී තිබුණා සේම ප්රබල වී තිබෙන බව ද පෙනෙන්නට විය.
එක්සත් ජාතික පක්ෂය රජයේ ලොකුම හිමිකාරීත්වය දරමින් කටයුතු කරන බව අගමැතිවරයාට අමතරව සෙසු ඇමැතිකාරකාදීන්ගේ වැඩ කටයුතුවලින් මෙන්ම අදහස් දැක්වීම්වලින් ද ගම්ය වන්නට වී තිබීම තුළ රටේ ජනතාව එක්තරා විචිකිච්ඡාවක පසුවන බව පෙනෙන්නට තිබුණෙත් දින සියය පිළිබඳ බලාපොරොත්තු ඒ විචිකිච්ඡාව සමනය කළ බව දැනගන්නට ලැබිණ. කෙසේ වෙතත් ආණ්ඩුවේත් විපක්ෂයේත් සෙසු පක්ෂවලත් ක්රියාශීලිත්වය නම් දෙගුණ තෙගුණ වී ඇති බව පැහැදිලි විය.
මේ අතර දින සියයට පසු එළඹෙන කාලවකවානුව පිළිබඳ විවේචනාත්මක අදහස් ද සමාජය පුරා පැතිර යන්නට වැඩි කලක් ගතවූයේ නැත. සමහර අදහස්වලින් කියවුණේ එජාපයත් ශ්රීලනිපයත් එකතු වී මහ මැතිවරණයක් පවත්වනවා වෙනුවට ජාතික ආණ්ඩුවකට ගෙනයැමට පිඹුරුපත් සකසමින් සිටින බවය. ඒ සඳහා සහභාගිවීමට ශ්රීලනිපයේත් ලොකු එකඟත්වයක් ඇති බවට කතා පැතිර යන්නට විය.
මේ කතාබහට ද රටේ නොයෙක් ප්රතිචාර පැතිර යන්නට පටන් ගත්තේය. ජනතා විමුක්ති පෙරමුණ ඊට විවෘතවම විරෝධය පළකරමින් කීවේ ජාතික ආණ්ඩු සභාග ආණ්ඩු මොනවා කියන්නත් පෙර අප්රේල් මාසයේ නියමිත කාලවකවානු පිරීමත් සමඟ පාර්ලිමේන්තුව විසුරුවා හැර මහ මැතිවරණයක් පැවැත්විය යුතු බවය. මේ තර්ක විතර්ක පසුගිය සතිය තුළ සමාජයේ වේගයෙන් පැතිර යමින් තිබියදී පක්ෂ අභ්යන්තරයේ ද ලොකු ලොකු පෙරළි සිදුවෙමින් තිබූ බව කිවමනාය.
ශ්රීලනිපයේ අතු ඉති හා මල් මුල්
මේ දිනවල අපේ රටේ දේශපාලනය ගැන කතා කරන විට වැඩිපුරම කතා කරන්නට සිදුවන්නේ ශ්රී ලංකා නිදහස් පක්ෂ දේශපාලනය ගැනය. ඊට හේතු දේශපාලන ක්රියාකාරකම් බහුලවම ඇත්තේ මේ දිනවල ශ්රී ලංකා නිදහස් පක්ෂයේ නිසාය. ඊට හේතු ද ගණනාවකි.
ශ්රී ලංකා නිදහස් පක්ෂයේ පාර්ශ්ව ගණනාවක් මේ දිනවල වෙන වෙනමම ක්රියාත්මක වෙමින් දේශපාලනය තුළ සක්රීයව සිටීම මෙහිදී පළමුව මුණගැසෙන හේතුවයි. මේ තත්ත්වය තුළ ශ්රී ලංකා නිදහස් පක්ෂය යනු කුමක්ද කියා තේරුම් බේරුම් කර ගැනීමට නොහැකිව පාක්ෂිකයා විපිලිසරව බලා සිටිතියි කීවාට වරදක් ද නැත.
ශ්රී ලංකා නිදහස් පක්ෂයේ වරලත් හා බලයලත් පළමු පාර්ශ්වය වූයේ ජනාධිපති මෛත්රීපාල සිරිසේනගේ නායකත්වයෙන් යුතුව පක්ෂ මූලස්ථානයේ ක්රියාත්මකව ඇති කණ්ඩායමයි. ඒ කණ්ඩායම තුළ විපක්ෂ නායක නිමල් සිරිපාල, මහ ලේකම් අනුර ප්රියදර්ශන, ජාතික සංවිධායක සුසිල් ප්රේමජයන්ත, අමාත්ය රාජිත, අමාත්ය දුමින්ද, හිටපු අමාත්ය ජනක, හිටපු අමාත්ය නාවින්න, හිටපු අමාත්ය පියසේන ගමගේ ඇතුළු විශාල පිරිසක් සිටිනවා යෑයි කීවාට වරදක් නැත.
මේ සියලු දෙනා ක්රියාකාරී ලෙස සහය දෙමින් සිටියේ ජනාධිපති මෛත්රීපාල සිරිසේනගේ දින සියයේ වැඩසටහන සාර්ථක කරගෙන ඔහුගේ අභිමතය පරිදි පක්ෂයේ ඉදිරි වැඩ කටයුතු සැලසුම් කිරීමටය.
ඒ හැරුණු විට ශ්රීලනිපයේ තවත් පදාසයක් කේන්ද්රගතව සිටියේ හිටපු ජනාධිපති මහින්ද රාජපක්ෂ මහතාටය. මැදමුලන රාජපක්ෂ නිවස කේන්ද්ර කරගෙන හා කොළඹ කථානායක නිල නිවස කේන්ද්රගතව රැස්වෙමින් බලය පතුරුවා හරිමින් දේශපාලන ලෝකයේ සක්රීයව කටයුතු කළ මේ පිරිස කටයුතු කළේ නිහඬවය. අදහස් ප්රකාශනයට යනවාට වඩා නිහඬ පිළිවෙතක් අනුගමනය කරමින් සිටි මේ කණ්ඩායම විශේෂයෙන් බලා සිටියේ ශ්රී ලංකා නිදහස් පක්ෂයෙන් තම පාර්ශ්වයේ නායකයාට ඇති පිළිගැනීම කුමක්දැයි දැන ගැනීමටය. අනාගතය ගැන අදහස් කියනවාට වඩා සිදුවන දේ දරාගෙන බලාගෙන ඉවසිලිවන්තව සිටීම මේ පාර්ශ්වයේ ඇති විශේෂත්වයයි.
මේ අතරතුර පළාත් සභා මහ ඇමැතිවරු හරහා කේන්ද්රගත වූ පිරිසක් ද ශ්රීලනිපයේ පළාත් හා ප්රාදේශීය තලයේ ක්රියාකාරීව සිsටියහ. මේ පිරිස නිතර ඒකරාශී වූ තැන වූයේ බස්නාහිර මහ ඇමැති ප්රසන්න රණතුංගගේ නිල නිවසයි. ප්රසන්න, දයාසිරි, ශාන් විජයලාල්, මහීපාල, පේෂල, සරත් ඒකනායක ආදී නායකයන්ගෙන් සැදුම්ලත් මේ බලවේගයන්ට අවශ්ය වූයේ හිටපු ජනාධිපතිවරු දෙදෙනා හා වත්මන් ජනාධිපති කෙසේ හෝ එක තැනකට ගෙනැවිත් ශ්රීලනිපය ශක්තිමත් කොට අනාගතයේදී ශ්රී ලංකා නිදහස් පක්ෂයේ රජයක් පිහිටුවීමයි. මේ සඳහා හැකි හැම උත්සාහයක්ම දැරූ මේ මහ ඇමැතිවරු එය සාර්ථක කරගත නොහැකිව විපිලිසර වෙද්දී බස්නාහිර මහ ඇමැති ප්රසන්න රණතුංග උත්සාහය අත්නොහැර දිගින් දිගටම සටන් වැදීම ද පසුගිය සතියේ කැපී පෙනෙන ලක්ෂණයක් විය.
තවත් පැත්තකින් මේ සඳහා යෝජනා වූයේ එක්සත් ජාතික පක්ෂ රජය පෙරළා දැමීමට හිටපු ජනාධිපති මහින්ද කරළියට ගෙන ආ යුතු බවය. ශ්රී ලංකා නිදහස් පක්ෂය තුළ ද එම අදහස නොවලහා කියන හිටපු ඇමැතිවරු වෙන වෙනම ඒ සඳහා සටනක් ගෙන යන්නට වූහ. විශේෂයෙන්ම කුමාර වෙල්ගම වැන්නවුන් එම අරමුණ වෙනුවෙන් තනිව කළ සටන හා අදහස් දැක්වීම් ද පසුගිය සතියේ කැපී පෙනිණි.
රවීගේ සල්ලි මල්ලට කරුගෙන් පැසසුමක්
කරු පසුගිය සිකුරාදා මහනුවරට ගියේ මධ්යම පළාත් සභාවේ විශේෂ සම්බන්ධීකරණ රැස්වීමට සහභාගිවීම සඳහාය. මේ රැස්වීම තිබුණේ මහනුවර පල්ලේකැලේ පළාත් සභා ශාලා සංකීර්ණයේය.
එහිදී ප්රධාන අමාත්ය සරත් ඒකනායක හා අභිනව මධ්යම පළාත් ආණ්ඩුකාරිනී සුරංගනී එල්ලාවල විසින් පළාත් සභා විෂය භාර අමාත්යවරයාව පිළිගනු ලැබීය.
සුරංගනී එල්ලාවල මෙහිදී විශේෂ කතාවක් කරමින් කරු ජයසූරිය අමාත්යවරයාව පිළිගත්තේ විශේෂ පැසසුමක් ද කරමිනි. ඕ කීවේ මේ දේශපාලන ජීවිතයේදී දුටු විශිෂ්ට ගණයේ නායකයකු ලෙස තමන් කරු ජයසූරිය මහතාව සලකන බවය. මේ රැස්වීම නිමකරමින් වැඩි වේලා නොගෙනම කරු කොළඹ බලා පැමිණියේ කොටා පාර ශ්රී ජයවර්ධනාරාම විහාරාධිපති දේවහන්දියේ පඤ්Æසේකර නාහිමියන්ගේ 80 වැනි ජන්ම දින උත්සවය වෙනුවෙන් පවත්වන ආශිර්වාද පූජෝත්සවයට කෙසේ හෝ සහභාගි වන්නට අවශ්යව තිබූ නිසාය.
සති අන්තයේ කරු ජයසූරිය ඇමැතිවරයා කොළඹ සිනමන් ලේක් හෝටලයේ පැවැති වරලත් නාවික නියෝජිතයන්ගේ සම්මාන ප්රදානෝත්සවයකට ද සහභාගි වූයේ ප්රධාන ආරාධිතයකු ලෙසය. ඊට තවත් අමාත්යවරයකු පැමිණ සිටියේය. හේ රවී කරුණානායකයි. රවී පැමිණ සිටියේ සිය ඇමරිකානු සංචාරය නිම කිරීමෙන් පසුව වීම නිසා කරු ඔහුට පොඩි විහිළුවක් ද කරන්නට අමතක නොකළේය.
රවී ආවේ ඇමරිකාවේ ඉඳල නේ. දැන් අපිට බයක් නැහැ. රවී වොෂින්ටන් ඉඳල අරන් ආපු ලොකු සල්ලි මල්ල නිසා මේ රටේ හුඟක් ප්රශ්න අපිට විසඳගන්න පුළුවන් වේවි. බඩු මිලත් දැන් සෑහෙන්න අඩු කරල තියෙන නිසා මේ ආණ්ඩුවේ මැන් ඔµa ද මැච් ඉතින් රවීට තමයි...
රවී ඊට කරුට සුපුරුදු සිනහවෙන් යුතුව මුව නොසෑහෙන සේ ස්තුති කළේය.
සාමාන්යයෙන් නම් අයවැයක් ලංවූ විට මුදල් ඇමැතිවරයා ලෝකයේ බලවත් රටවල් කිහිපයකට ගොස් ආයෝජන හා මුදල් ප්රතිපාදන එක්කාසු කරගෙන ඒම අපේ පැරණි සිරිතයි. එම සිරිත අකුරටම ක්රියාත්මක කළ මුදල් ඇමැතිවරයකු ලෙස සැලකුණේ හිටපු අමාත්ය රොනී ද මැල්ය. රොනීගේ මේ පැරණි ක්රමවේදයේ අගය රවී ද හොඳින් දැන සිටියේය. රවී ඉතා ගරු කරන මුදල් ඇමැතිවරයකු වන රොනීව හමුවන්නට පසුගිය සතියේ යැම දේශපාලන ලෝකයේ කතාබහට ලක් වූ තවත් විශේෂ සිද්ධියක් විය.
ශ්රීලනිප වැඩමුළුවේ වෙල්ගම ඩිලාන් ගැටුමක්
ශ්රී ලංකා නිදහස් පක්ෂයේ මන්ත්රීවරුන්ගේ සමගිය සමාදානය හා සංහිඳියාව ඇති කිරීමේ අරමුණ ඇතිව පුළුල් සංවාදයක් සහිත වැඩමුළුවක් පැවැත්විය යුතු යෑයි යෝජනාව පැමිණියේ මීට සති කිsහිපයකට පෙර සිටය. ජනාධිපති මෛත්රීපාල සිරිසේන මේ පිළිබඳ සිය උපදේශකයන් හා හිතවතුන් සමඟ සාකච්ඡා කරද්දී එම කටයුත්ත ඉතා ක්රමවත්ව කරන්නට වගකීම් බාරගත්තේ වත්මන් ශ්රී ලංකා පදනමේ සභාපති මලිත් ජයතිලකයි. මලිත් සමඟ ඩිලාන් පෙරේරා හිටපු ඇමැතිවරයා ද මේ කටයුත්තට ලොකු උනන්දුවකින් කටයුතු කළ අතර තවත් වෘත්තීයවේදීන් කිහිපදෙනකුගේ ද උපදෙස් ලැබිණි.
ඉකුත් 21, 22 දෙදින තුළ මේ වැඩමුළුව පවත්වන්නට යොදාගැනුණේ කටුනායක µqල්මූන් හෝටලයයි. එම හෝටලය කලක් සැලකුණේ අමාත්ය ජෙයරාඡ් ප්රනාන්දුපුල්ලේගේ හෝටලයක් ලෙසයි. එහෙත් එය ජෙයරාඡ්ගේ හිතවතකු වූ ධනේෂ් නම් අයකුගේ විය. පසු කලෙක ධනේෂ් ඩිලාන් මන්ත්රීවරයාගේ ගජ මිතුරකු විය. එම නිසා එම නිස්කලංක ස්ථානය මේ වැඩමුළුව සඳහා යොදාගැනීමට වඩාත් පහසු විය.
මෙම වැඩමුළුවට මන්ත්රීවරු පැමිණිය යුතුව තිබුණේ සෙනසුරාදා හවස 3.00 ටය. එදින සවස 3.00 වන විට මන්ත්රීවරු 72 ක්ම පැමිණ සිටියහ. වැඩමුළුවේ සම්පත් දායකයන් ලෙස පැමිණ සිටියේ ආචාර්ය ජගත් වැල්ලවත්ත, අශෝක අබේගුණවර්ධන, මලිත් ජයතිලක, මහින්ද රාමනායක, බනුර ජයතිලක ආදී පිරිසකි.
මෙම වැඩමුළුවේදී මන්ත්රීවරුන්ගේ අවධානය යොමු කළ කරුණු වූයේ ජාතික ආණ්ඩු සංකල්පය, ආණ්ඩුක්රම ව්යවස්ථාව හා අනාගත මැතිවරණ ක්රමය සංශෝධනය කිරීම යනාදියයි.
කෙසේ වෙතත් මේ වැඩමුළුව මන්ත්රීවරුන්ගේ හිත් නොහඳකම හා දුරාවබෝධයන් දුරුකර ගැනීමට කදිම අවස්ථාවක්ව තිබිණ. සමහර අය ඡන්දයෙන් පසු එකිනෙකා හමුවූයේ ද මෙහිදීය. එකිනෙකා කතාබහ කරමින් තර්ක විතර්ක කරමින් අදහස් හුවමාරු කර ගනිමින් එකඟවිය යුතු තැන්වලට එකඟ වන්නටත් තර්ක කළ යුතු තැන්වලදී තර්¨ක කරන්නටත් අඩු පාඩු හදාගන්නටත් අවස්ථාවක් කරගත යුතු බව දේශකයෝ කියා සිටියහ.
ජනාධිපති මෛත්රීපාල සිරිසේන මේ වැඩමුළුවට ආවේ සවස 6.30 ට පමණය. ඒ මොහොතේ සභාව අමතා දේශනය කරමින් සිටියේ බනුර ජයතිලකයි. ඔහුගේ දේශනය තරමක් ප්රශ්නකාරී වූයේ සමහර මන්ත්රීවරු ඔහුගේ අදහස් එකඟ නොවූ නිසාය.
"අපි මේ මැතිවරණය ජනාධිපති මහින්ද රාජපක්ෂ පරාජය වන බව කලින් දැනගත්තා. අපි කලින්ම එතුමට කිව්ව. එයා ඒක ගණන් ගත්තේ නැහැ. අපේ අනතුරු හැඟවීම් ගණන් නොගෙන වැඩ කරපු නිසා එයා පරාද වුණා. නමුත් වැරදි හදාගත්තේ නෑ."
මේ අයුරින් බනුර කතා කළේම ශ්රී ලංකා නිදහස් පක්ෂයේ අඩුපාඩු හා දුර්වලතා පෙන්නුම් කරමිනි. ඉදිරි මැතිවරණයේදී වුව ශ්රී ලංකා නිදහස් පක්ෂයට ජයග්රහණය සඳහා ඉඩකඩක් නැතැයි ඔහු දේශනයේදී පෙන්වා දෙන්නට උත්සාහ කළේ ඔය අතරය. එහෙත් එතන සිටි කුමාර වෙල්ගම මන්ත්රීවරයා ඒ අදහසට තරයේ විරුද්ධත්වය ප්රකාශ කළේය.
අපි මේ ඇවිල්ල ඉන්නෙ පරාද වන හැටි දේශන අහන්න නෙවෙයි. පරාජය වළක්වල ජයග්රහණය ලබන්නෙ කොහොමද කියන එක ගැන කතා කරගන්නයි. ඔයගොල්ල ඔය කරන්නෙ අපේ පක්ෂයෙ ශක්තිමත් කරන එක නොවෙයි. දුර්වල කරන එක. ඒකට ඉඩ දෙන්න බැහැ.
මේ මොහොතේ දේශකයා වෙනුවෙන් කතා කළේ ඩිලාන් පෙරේරාය. හිටපු ඇමැතිතුමා පොඩ්ඩක් අහන් ඉන්න. ඉවසන්න පුරුදු වෙන්න. ඩිලාන් කීවේය.
එහෙත් කුමාර වෙල්ගම සිය අදහස් දිගටම කියා සිටියේය. මෙබඳු සාකච්ඡාවලදී කළ යුත්තේ පක්ෂය පාගා දැමීම නොව නඟාසිටුවීම බව ඔහු පෙන්වා දුන්නේය. අපට ඕන අපි දිනන විදිහක් ගැන කතා කරන්න.
හරි ඉතින් දිනන්න පුළුවන් තත්ත්වයක් තියෙන්න එපාය. එහෙම තත්ත්වයක් තවම නෑ.
මම කියන්නෙ ගමේ මිනිස්සුන්ගෙ අදහස්. අපිට ඕන ශ්රී ලංකා නිදහස් පක්ෂයෙ ආණ්ඩුවක්. ගමේ මිනිහ ඉල්ලන්නෙ ඒ සඳහා වැඩපිළිවෙළක්. වෙල්ගම කීවේය.
ඔබතුමා ඔය නුගේගොඩ බලයට ගිහිල්ල එතන පාට් මෙතන දාන්න එන්න එපා. කට්ටියක් දඟලන්නෙ අපේ ශ්රී ලංකා නිදහස් පක්ෂය දෙකඩ කරන්න. කියමින් ඩිලාන් කුමාර වෙල්ගමට අභියෝග කළේය.
කවුද පක්ෂය කඩන්න හදන්නෙ කියල මගෙන් අහගන්න එපා. අපි දන්නව තමුන්නාන්සේගෙ තාත්තා මාෂල් පෙරේරා සබරගමුවෙ ආණ්ඩුකාරය වෙච්ච හැටි. මගේ කට අවුස්සගන්න එපා.
මේ සංවාදය එතනින් එහාට ඇදී ගියේ නැත. ඩිලාන් තරමක් සන්සුන්ව ඊළඟ පියවර සඳහා ඉඩ දුන් අතර මෙබඳු වැඩමුළුවලින් පක්ෂයට පලක් නැතැයි කියමින් කුමාර වෙල්ගම ද එතනින් පිටව ගියේය.
එතනින් පසුව සාකච්ඡාව තරමක් ලිහිල් පැත්තට බර විය. ජනාධිපති මෛත්රීපාල සිරිසේන ඊළඟට කතා කරන්නට විය. ඔහු කළේ පක්ෂය පිළිබඳ හොඳ විග්රහයකි. සාරගර්භ කතාවකි. තමන්ට ශ්රී ලංකා නිදහස් පක්ෂයේ අයිතිය ලබාගැනීමට ආසාවක් ඇති නොවූ බව කියමින් ඔහු කීවේ එය තමන් වෙත පැමිණි තනතුරක් බවයි. ඒ වෙනුවෙන් මහන්සි නොවූ බවත් ඔහු කීවේය. එහෙත් දැන් මේ පක්ෂය ජයග්රහණය කරා ගෙන යා යුත්තේ අපි සැවොම එක්වී බව ඔහු අවධාරණය කළේය.
ඊළඟට පක්ෂය ඇතුළේ තිබෙන අර්බුද ගැන ද මෛත්රීපාල ජනාධිපතිවරයා කතා කළේය.
ඇයි අර නුගේගොඩ රැස්වීමට පක්ෂයෙ කට්ටියකට යන්න දුන්නෙ. ඒක වැරදියි. අපි මධ්යම කාරක සභාවෙදි තීන්දුවක් ගත්ත නේ ඒකට යන්නෙ නැහැ කියල.
මෙම ප්රකාශය ජනාධිපතිවරයා කළේ අනුර ප්රියදර්ශන හා සුසිල් ප්රේමජයන්ත දෙස බලමිනි.
අනුර හා සුසිල් ඊට උත්තර දුන්නේ නැත. සිනාසුණා පමණි. ඒ මොහොතේ මෛත්රීපාල කීවේ අපේ ලේකම්තුමයි ජාතික සංවිධායකතුමයි තවමත් හිටපු ජනාධිපතිවරයාට බයයි වගේ.... කියාය.
එදා රාත්රියේ වැඩමුළුව තවදුරටත් ඇදී නොගියේ රාත්රී සාදයක් ද සූදානම් කර තිබූ නිසාය. එය කෑමෙන් හා බීමෙන් පිරි ඉතා වර්ණවත් රාත්රි ආහාර වේලක් ලෙස ගෙවී ගියේය.
ඩිලාන්ටත් මල් සහ ගල්
පසුවදා උදෙන්ම නැවතත් වැඩමුළුව ආරම්භ කෙරිණි. උදේ ජනාධිපති මෛත්රීපාල සිරිසේන මන්ත්රීවරු අමතන්නට පැමිණ සිටියේය. එදා ඔහු කතා කළේ ජාතික ආණ්ඩුවක් ගැනය. ආණ්ඩු ක්රම ව්යවස්ථාව සංශෝධනය කිරීම, මැතිවරණ ක්රමය සංශෝධනය කිරීම ආදිය ගැන ද ඔහු කතා කළේය.
මෙම දින 100 වැඩපිළිවෙළ තමන්ගේ යෝජනාවක් බව පෙන්වා දුන් ජනාධිපතිවරයා එය සාර්ථක කර දීමට එජාපය සේම ශ්රීලනිපයත් කැපවිය යුතු බව පෙන්වා දුන්නේය. ඒ අතර රට ඉදිරියට ගෙන යැමේ වැඩසටහන මේ දින 100 තුළ සාර්ථක කර ගැනීම අසීරු නම් ඉන් ඉදිරියට ද ජාතික ආණ්ඩුවක් ලෙස කටයුතු කිරීම දෙපිරිසම වගකීම් දරමින් රට හමුවේ හොඳ පාලනයක් පෙන්විය හැකි බව ද ඔහු පෙන්වා දුන්නේය.
මේ අයුරින් වැඩමුළුව එදින හවස ඉතා සාර්ථකව අවසන් විය. මෙබඳු වැඩමුළුවක් තුළින් පක්ෂයේ මන්ත්රීවරු අතර තිබූ දුරාවබෝධයන් හා නොගැලපීම් දුරුව යන බව හා අලුත් විශ්වාසයක් මෙන්ම එකට එක්වී වැඩ කිරීමට හැකියාවක් ඇති වන බව මන්ත්රීවරු කීහ.
මේ වැඩමුළුව සංවිධානය කිරීම ගැන හුඟදෙනෙක් ඩිලාන් මන්ත්රීවරයාට තුති පුද කළහ. ඔවුහු කීවේ ඩිලාන් ඉතා මැනවින් සියල්ල සංවිධානය කර සැලසුම් කර තිබූ බවය. මන්ත්රීවරු අතර සුහදතාවය, හොඳ හිත ඇතිවූවා පමණක් නොව මෙතෙක් දිනක් තිබූ සැකයන් හා විචිකිච්ඡාවන් ද පහකර ගැනීමට තමන්ට හැකිවිණැයි ඇතැමකු පැවසූහ.
එහෙත් ඩිලාන්ගේ ව්යායාමය විවේචනය කළ අය ද නොසිටියාම නොවේ. මේ වැඩමුළුව තනිකරම ශිරාල් ලක්තිලකලාගේ රාජ්ය නොවන සංවිධාන හරහා ශ්රීලනිපය දුර්මුඛ කරවීමට ඇටවූ උගුලක් බව ඔවුහු කීහ. මෙය තුළ අනාගත යූඇන්පී රජයක හෝ අනාගත සභාග රජයක සෙවනැල්ල මිස ශ්රී ලංකා නිදහස් පක්ෂයේ ජයග්රහණයක් දක්නට නැතැයි කියමින් ලොකු විවේචනයක් සපයමින් විසිර ගිය කිහිපදෙනකු ද එහි සිටියහ.
ශෂී දේශපාලනයට ගෙනෙන මෙහෙයුමක් ඇරඹිලා
පසුගිය සතියේ රටේ දේශපාලන කතිකාවේ තවත් කැපී පෙනෙන මාතෘකාවක් වූයේ ශෂී වීරවංශගේ සිද්ධියයි. මේ සිද්ධිය නිසා පසුගිය සතියේ අපේ රටේ දේශපාලන කතිකාව අමුතුම මුහුණුවරක් ගත්තා යෑයි කිවහොත් නිවැරැදිය. එය සිදුවූයේ මෙසේය.
නුගේගොඩ නගරයට මහත් සෙනඟක් එක්රැස් කරමින් විමල් වීරවංශලා, දිනේෂ් ගුණවර්ධනලා, වාසුලා, උදයලා පවත්වන ලද මහා රැලිය අවසානයේ සියල්ලෝම විසිර යද්දී බත්තරමුල්ලේ විමල් වීරවංශගේ ගෙදර විශේෂ සිද්ධියක් සිදුවෙමින් තිබිණ. එදා ඒ ගෙදරට තලංගම පොලිසියේ නිලධාරීන් දෙදෙනෙක් පැමිණ ශෂී වීරවංශ කියන්නේ කවුදැයි අසා සිටියහ. ඒ මොහොතේ විමල් සිටියේ නැත. සිටියේ ශෂී සහ දරු දෙදෙනාය. ශෂී තමන් බව කී විට නිලධාරීන් දෙදෙනා ඇයට එක්තරා වරෙන්තුවක් ලිතව භාරදුන්නේය.
එහි තිබුණේ කූඨ ලේඛන සෑදීම හා ළඟ තබාගැනීම සම්බන්ධ චෝදනාවකට පිළිතුරු දීමට ශෂී වීරවංශ මහත්මියට කොළඹ අපරාධ කොට්ඨාසයට පැමිණ උදේ 11.00 ට කටඋත්තරයක් ලබාදෙන ලෙසයි.
මේ ආරංචියත් සමඟ විමල් වීරවංශ ද කලබල විය. ශෂීට මෙය දරා ගත නොහැකි වියවුලක් විය. ඇයට මානසික ආතතිය ඇතුළු තවත් ප්රශ්න ගණනාවකට මුහුණ දෙන්නට සිදුවිය. එහි ප්රතිඵලයක් වූයේ ඇයට එදින රාත්රියේම ප්රතිකාර ගන්නට වෛද්යවරයකු සොයා යන්නට සිදුවීමයි.
මේ නිසා ඇයට 19 වැනිදා උදේ අපරාධ කොට්ඨාසයට ගොස් කටඋත්තරයක් ලබාදීමට නොහැකි විය. ඒ සඳහා නීතිඥයකු මාර්ගයෙන් ලිපියක් යෑවීමට විමල් පාර්ශ්වය වගබලා ගත්තේය.
ඒ අතර ශෂීව මාලබේ නෙවිල් ප්රනාන්දු රෝහලේ නතර කරන්නට විමල් පාර්ශ්වය කටයුතු කළේ ඇයට තිබූ රෝගාබාධ තත්ත්වය උත්සන්න වූ නිසාය. පොලිසියට යවන ලද ලිපියේ ඇය නතරව සිටින රෝහලේ කාමර අංකය පවා ලියා යවන්නට විමල් පාර්ශ්වය කටයුතු කළේ කටඋත්තරයක් ගැනීමට අවශ්ය නම් එහි පැමිණීමට පහසු වන ලෙසය.
මේ අයුරින් දවසක් ගෙවී ගියේය. 22 වැනිදා උසාවි වරෙන්තුවක් ද සහිතව මාලබේ රෝහලට ගිය රහස් පොලිසිය ඇයව අත්අඩංගුවට ගන්නට කටයුතු කළේය. එහෙත් ඇය අත්අඩංගුවට ගන්නට නියෝගයක් නොතිබිණි. මහෙස්ත්රාත්වරයා කීවේ ඒ සඳහා වරෙන්තුවක් නැතිව වුව රහස් පොලිසියට බලය තිබෙන බවයි.
පහුවදා (22 දා) රහස් පොලිසිය ශෂී වීරවංශ හමුවන්නට මාලඹේ රෝහලට ගියේ අධිකරණ වෛද්ය නිලධාරියකු ද සමඟය. වෛද්යවරුන්ගේ මතය වූයේ ඇයගෙන් කටඋත්තරයක් ගත හැකි බවය. පොලිසියට අවශ්ය වූයේ ඇයව බන්ධනාගාරගත කිරීම සඳහා රැගෙන යැමය. එහෙත් ඊට රෝහලෙන් ඉඩකඩ නොලැබුණේ වෛද්යවරුන්ගේ මැදිහත්වීම නිසාය. පපුවේ අමාරුවක් හා මානසික ආතතියත් සමඟ වෛද්ය ප්රතිකාර ලබා දී තිබෙන බැවින් වෛද්යවරු ඒ තත්ත්වය ප්රතික්ෂේප කර තිබිණි.
කෙසේ වෙතත් රහස් පොලිසිය අතහැරියේ ද නැත. ඊළඟ දිනයේ රහස් පොලිසිය පැමිණ සිටියේ ශෂී වීරවංශ පරීක්ෂා කිරීමට අධිකරණ වෛද්යවරියක ද සමඟය. 24 වැනිදා හවස ඇගේ නිර්දේශය වූයේ ශෂී බන්ධනාගාරගත කිරීමට සුදුසු තත්ත්වයක පසුවන බවයි. අවශ්ය නම් එහිදී බන්ධනාගාර රෝහලේ ප්රතිකාර ලැබිය හැකි බව ද ඉහත වෛද්යවරියගේ නිර්දේශය විය. එම නිර්දේශය මත ශෂීව බන්ධනාගාර රෝහල වෙත ගෙන යනු ලැබීය.
මේ අයුරින් දිගින් දිගටම ශෂීගේ සිද්ධිය දික්ගැසී ගියේය. විමල් මේ නිසා යම් විස්සෝපයකට පත්ව සිටියත් එය පිටත නොපෙන්වා ශක්තිමත්ව කටයුතු කරන්නට තරම් ධෛර්යවත් විය. විමල්ගේ දරු දෙදෙනා ද සංවේදී මුත් ශක්තිමත්ව දරාගන්නට තරම් හැකියාවක් පෙන්නුම් කළහ.
සියල්ල අවසන් වූයේ 27 වැනි සිකුරාදා ඇයට ඇප මත නිදහස ලබා එළියට යන්නට ඉඩකඩ සැලසීමත් සමඟය. එහෙත් පරීක්ෂණවල ඉවරයක් නොවීය. ඇයට පමණක් නොව විමල් වීරවංශට ද පසුගිය සතියේ රහස් පොලිසියට යන්නට සිදුවූයේ 2011 දී කරන ලද පැමිණිල්ලකට උත්තර බඳින්නටය. මේ අයුරින් වීරවංශ පවුලට විඳින්නට සිදු වූ කරදර නම් පසුගිය සතියේ බොහෝමයක් තිබිණි.
මෙම සිද්ධි දාමය ඇතැමුන්ගේ සතුටට හේතුවක් වුවත් තවත් අයගේ විමතියට ද හේතුවක් වී තිබිණි. රජයේම ප්රබල ඇමැතිවරයකු වූ රාජිත සේනාරත්න පවා මේ සිදුවීම් දාමය විවේචනය කරමින් කීවේ කූඨ ලේඛන සෑදීම බඳු වරදකට ශෂී වීරවංශ මේ අයුරින් අපහසුතාවට පත්කිරීමෙන් ඔවුනට අනවශ්ය වටිනාකමක් මෙන්ම මහජන අනුකම්පාවක් හිමිවන බවය. ඔහුගේ වචනවලින්ම කියන්නේ නම් "අපරාධ කරපු තෝරු මෝරු තාමත් නිදැල්ලෙ ඉන්නවා. මේ රහස් පොලිසියේ උදවිය ඒ අය ගැන තවමත් පියවර අරන් නෑ. ඒ වුණාට මේ වගේ කොහෙවත් ඉන්න ලාග්ගෙක් හාල්මැස්සෙක් අල්ලන් සෙල්ලම් දානවා." මේවාට වඩා කරන්නට දේවල් තිබෙන බව ඔහු දැඩි සේ කියා සිටියේය.
සමහරු මේ තත්ත්වය විග්රහ කළේ මෙම සිදුවීම් ජාලය තුළ ශෂී වීරවංශට දේශපාලනයට පිවිසෙන්නට ද ඉඩකඩක් විවර වූ බව කියමිනි. ඇයට තව ටිකක් වද දුන්නේ නම් තව ටිකක් ප්රශ්න කරන්නට වෙහෙස කරවූයේ නම් නිසැකවම ඊළඟ මහ මැතිවරණයේදී මන්ත්රී ධුරයක් ජයග්රහණය කිරීමට පවා සුදුසුකමක් සමාජයේ නිර්මාණය වන බවය.
පසුගිය බදාදා හවස ශ්රීලනිප මූලස්ථානයේ තවත් විශේෂ රැස්වීමක් පැවැත්විණි. එසේ රැස්ව සිටියේ ශ්රී ලංකා නිදහස් පක්ෂයේ ව්යවස්ථා සංශෝධන කමිටුවයි. මේ සඳහා විපක්ෂ නායක නිමල් සිරිපාල, සුසිල් ප්රේමජයන්ත, අනුර යාපා, පවිත්රා වන්නිආරච්චි, ජෝන් සෙනෙවිරත්න, ප්රසන්න රණතුංග, එස්. බී. දිසානායක, ලක්ෂ්මන් යාපා ආදීහු පැමිණ සිටියහ. මෙහිදී නිමල් සිරිපාල ප්රසන්නව දැක මෙසේ කීවේය.
"ඔයා ප්රසන්න අර නුගේගොඩ ගිහිල්ල අපිට පුදුම ප්රශ්න ගොඩකට තමයි මුහුණ දෙන්නට සිද්ධවුණේ."
"ඇයි සර් මම කියල නේ ගියේ. ප්රශ්නයක් එන්න විදියක් නෑනෙ."
"ඒ වුණාට ප්රසන්න ඔය රැස්වීම තිබුණෙ පරාජිතයෙක්ව ආපහු ගේන්න නේ. එයාව පරාජය කළේ එයාගෙ පවුලෙම අයයි" නිමල් සිරිපාල කීවේය.
මේ නිසා ප්රසන්නට තරමක් කේන්ති ගියේය. ඔහු නිමල් සිරිපාලට උත්තර දුන්නේ තරමක් වේගයෙනි.
"සර් එහෙම කතා කරන්න එපා. මහින්ද මහත්තයව පරාද කළේ පවුලෙ අය කියන එක වැරදියි. මොකද එයා ශ්රීලනිපයෙ අපේක්ෂකයා. පරාද වුණාම අපි පක්ෂයක් හැටියටයි වගකීම් දරන්න ඕනෙ. අනිත් එක සර්ට පරාජිතයො ගැන කතා කරන්න කිසිම අයිතියක් නෑ. මොකද සර්රුත් බදුල්ලෙදි දිගටම ආසනේ පරාද වුණා. සර් තමයි හොඳම පරාදිතයා." ප්රසන්න කීවේය.
මෙයා නම් මාර කතා තමයි කියන්නෙ. ජෝන් සෙනෙවිරත්න කීවේය.
මම කියන්නෙ මාර කතා නෙවෙයි සර්. සර්ලගෙ මතය එකක්. ඒ වුණාට ගමේ මිනිස්සු තවම කියන්නෙ වෙනම එකක්. ගමේ මිනිස්සු කියන්නෙ මහින්ද මහත්තය නැතිව ශ්රීලනිපය දිනවන්න බෑ කියල. අපේ පක්ෂයේ ඉහළ අය ඒක පිළිගන්නෙ නෑ. ඔන්න ඕකයි මම කියන්නෙ. ඔය තත්ත්වෙ නිසා තමයි මේ ඔක්කොම ප්රශ්න. කියමින් ප්රසන්න තත්ත්වය විග්රහ කළේය.
මේ අයුරින් එම සාකච්ඡාව ද අවසන් වූයේ අවශ්ය මාතෘකාවන් කතාබහ කර ගැනීමෙන් අනතුරුව ලොකු උණුසුම් වාද විවාද ද කිහිපයක් මැදය.
ප්රසන්නව එළවන්නත්
රහසිගත මෙහෙයුමක්·
ප්රසන්න රණතුංග පසුගිය සති කිහිපය පුරාම අපේ රටේ ජාතික දේශපාලනයේ කැපී පෙනෙන චරිතයක් වූයේ හිටපු ජනාධිපති මහින්ද රාජපක්ෂ වෙනුවෙන් ගෙන ගිය සටන නිසාය. ඔහු මහින්දගේ ආගමනය වෙනුවෙන් ලොකු සටනක් කරන අයකු යෑයි කීවොත් බොරුවක් නොවේ.
එහෙත් ශ්රීලනිපය තුළ වර්තමානයේ තිබෙන තත්ත්වය මත ප්රසන්නව පිළිගත්තේ පක්ෂයේ මතයට විකල්ප අදහසක් දරන දෙවන පෙළ නායකයකු ලෙසයි. එම නිසා ප්රසන්නට රිදවීමට හැකිදැයි සොයා බලන්නට ද පිරිසක් පිඹුරුපත් සකසමින් සිටියහ.
එයයිගෙ ඔක්කොම කෙරුම් ඉවරයි මහ ඇමැතිකමට තට්ටු කරන්න පුළුවන් වුණා නම්.... කියමින් ඒ ගැන අදහසක් ඉදිරිපත් කළ ප්රබල ඇමැතිවරයකු ද සිටියේය.
එම ඇමැතිවරයා එම කතාව කියා තිබුණේ පසුගිය සතියට පෙර සතියේ සෙනසුරාදා ශ්රීලනිප විධායක සභාව තිබූ දා රාත්රියේය. එදා බත්තරමුල්ලේදී හිරුණිකාට හා එම්. කේ. ඩී. එස්. ගුණවර්ධනට බැණ වදිමින් කලබල ඇති කළ පිරිස අතර වැඩිපුරම සිටියේ බස්නාහිර පළාත් සභාවේ උදවියය. ඒ නිසා පක්ෂය සිතුවේ මෙය තනිකරම ප්රසන්නගේ මෙහෙයවීමෙන් සිදු වූ කලබලයක්ය කියාය. ප්රසන්නට දඬුවමක් දෙන්නට කල්පනා කළේ එහෙයිනි.
ප්රසන්න මහ ඇමැතිකමෙන් ඉවත් කළ යුතු යෑයි ඇමැතිවරයෙක් යෝජනා කළේ ඒ අතරතුරය.
මේ අතර එක්සත් ජාතික පක්ෂය පැත්තෙන් ද ප්රසන්නගේ මහ ඇමැතිකමට තට්ටු කිරීමට ලොකු සූදානමක් තිබිණි. ප්රසන්න උසාවි ගොස් තහනම් නියෝගයක් ලබාගත්තේ එම මෙහෙයුම හෙළිවූ පසුවයි.
මේ නිසා කළුතර දිස්ත්රික්කයේ නායකයෙක් අලුත් යෝජනාවක් ගෙන ආවේ ප්රසන්නගේ බල බිඳින්නට කදිමම පුද්ගලයා රංජිත් සෝමවංශ බව හුවාදක්වමිනි.
එහෙත් රංජිත් සෝමවංශ යනු විටින් විට බරපතළම අසාධාරණයන්ට ලක් වූ පළාත් සභා මන්ත්රීවරයෙකි. ශිෂ්ය නායකයකු ලෙස කොළඹ විශ්වවිද්යාලයෙන් දේශපාලනය පටන්ගත් ඔහු කළුතර ප්රබල තරුණයකු වුවත් ඔහුට නැගිටින්නට බැරි වූයේ විටින් විට ශ්රීලනිපයට හා එජාප නායකයන්ට තම අසුන පරිත්යාග කරන්නට ඔහුට සිදු වූ නිසාය. එම අසාධාරණයට ඔහු ලක්වූයේ වරක් දෙවරක් නොවේ. කීප වරකි.
ඒ නිසා ඔහු මෙවර මහ ඇමැතිකම බාරගන්න යෑයි කිවහොත් අකමැති නොවන බව හො¹කාරවම කළුතර දිස්ත්රික්කයේ නායකයෝ දැන සිටියහ.
මෙම සූදානම යටිතලයෙන් ක්රියාත්මක වූවත් මතුපිටට පැමිණියේ කොළඹ දිස්ත්රික්කයේ එක්තරා පළාත් සභා මන්ත්රීවරයෙක් පසුගිය දිනක කළුතර දිස්ත්රික්කයේ පළාත් සභා මන්ත්රීවරයකුට කතා කර කියන ලද ආරංචියත් සමඟය. කොළඹ මන්ත්රීවරයා ඉසුරය. කළුතර මන්ත්රීවරයා පියල් නිශාන්තය.
අපි පොඩි වැඩපිළිවෙළක් ගෙනියනවා. ඕගොල්ලන්ගෙ දිස්ත්රික්කයේ රංජිත් සෝමවංශ මහ ඇමැති කරන්න. ඔයාල එකතුවෙලා මේකට සපෝට් එකක් දෙන්න ඕන. ඔයාලයි ගමේ මිනිහ නේ.
අපෝ රංජිත්ට පුළුවන්ද මහ ඇමැතිකමක් කරන්න. සෞඛ්ය අමාත්යාංශයවත් හරියට කරගන්න බැරි මිනිහා. යෑයි පියල් කීවේය.
මේ අයුරින් එම කතාබහ යට ගියත් නැවත වරක් පියල්ට කළුතර ප්රදේශයෙන්ම යෝජනාව පැමිණියේය. පියල් ඊට විරුද්ධ විය. මෙම කතාබහ එහෙ මෙහෙ හුවමාරු වෙද්දී ප්රසන්නට ද ආරංචිය කාන්දු විය.
මහින්දවාදියකු වීම නිසා මහ ඇමැතිකම පවා අහිමිවීමට යන බව ප්රසන්නට වැටහිණි. එහෙත් ඔහු ඒ කිසිවකින් කලබල වූයේ නැත. පසුගිය සඳුදා පත්තරවල එම ආරංචිය පළවිය.
මේ අතර ගම්පහ දිස්ත්රික්කයේ ප්රාදේශීය සභා සභාපතිවරු රැසක් කැලණිය ප්රාදේශීය සභාවේ එක්ව සිටියේ මේ ප්රශ්නය ගැන විසඳුමකට එන්නය. මොරටුව නගරාධිපති සමන් ලාල් ද මෙතනට පැමිණියේය. ඔවුන් කතාබහ කළේ ප්රසන්නව ඉවත් කිරීමට යන සැලසුම පරාජය කිරීම ගැනය.
අපි මේ ගැන කෙළින්ම ගිහිල්ල විපක්ෂ නායකතුමාගෙනුයි, ජාතික සංවිධායකතුමාගෙනුයි අහල බලමු. සභාපතිවරු කීහ.
ඒ අනුව සියලුම දෙනා පක්ෂ මූලස්ථානයට යනු ලැබූහ. ඒ වෙලාවේ සුසිල් ප්රේමජයන්ත එතන සිටි අතර නිමල් සිරිපාල ද මොහොතකට පසු පැමිණියේය. සභාපතිවරු මේ ප්රශ්නය කෙළින්ම විපක්ෂ නායකටත්, ජාතික සංවිධායකටත් ඉදිරිපත් කළේ කළුතර දිස්ත්රික්කයේ ප්රබල ඇමැතිවරයකුගේ නමක් ද ඒ ප්රශ්නයට ඈඳමිනි.
මේක වුණොත් අපි තවදුරටත් ඉවසන්නෙ නෑ. සභාපතිවරු කීහ.
නෑ එහෙම වෙන්නෙ නෑ.... ප්රසන්න කියන්නෙ අපේ පතාක යෝධයෙක්. අපි ඒකට ඉඩ තියන්නෙ නෑ. සුසිල් ප්රේමජයන්ත පොරොන්දු වූයේය.
එම පොරොන්දුවද ලබාගෙන සභාපතිවරු ඊළඟට පිටත්ව ගියේ මහ ඇමැති ප්රසන්න රණතුංග හමුවීමටය.
ප්රසන්න නිල නිවසේ සිටියේය. ඒ සමඟ හිටපු ලේකම්වරයකු වන කුමාරසිරි හෙට්ටිගේ ද සිටියේය. සභාපතිවරු උද්ගතව ඇති ප්රශ්නය ප්රසන්නට කීහ.
හරි ඔය කතාව බොහොම තදින් යනව තමයි. හැබැයි අපි ඇහුවාම නෑ කියනවා... නමුත් කළුතර කට්ටියගේ මෙහෙයුමක් තියෙනවා. මම දන්න විදියට තවම ඒකට එකඟ වෙලා ඉන්නෙ පළාත් සභා මන්ත්රීවරු හතරදෙනයි. නැත්නම් පස්දෙනයි. බහුතරය අපි සමඟ ඉන්නව නෙ. කමක් නෑ. එන තත්ත්වෙකට මුහුණ දෙමු. ප්රසන්න කීවේය.
මේ අතර හෙට්ටිගේ දෙසට හැරුණු සභාපතිවරු හිටපු ජනාධිපතිතුමා ඊළඟට එන පළාත් පාලන ඡන්දයේදී තමන්ට සහයෝගය දෙන එකක් නැද්දැයි විමසූහ.
ඔයාලම අහන්නකෝ ජනාධිපතිතුමාගෙන් කියූ හෙට්ටිගේ දුරකථනය අතට ගෙන මහින්ද රාජපක්ෂට ඇමතුමක් ගත්තේය.
එසේ කියා දුරකථනය දුන්නේ සමන් ලාල් අතටය. සමන් හිටපු ජනාධිපතිවරයාට ප්රශ්නය යොමු කළේය.
හරි... හරි.. මම මොන තත්ත්වේ හිටියත් ඕගොල්ල ඡන්දෙ ඉල්ලන වෙලාවට ඕගොල්ලන්ගෙ සහායට එනවා එනවාමයි. ඔයාල ඉල්ලනව නම් මම මොකද නොඑන්නෙ. මහින්ද එසේ කියමින් දුරකථනය විසන්ධි කළේය.
ජාතික ආණ්ඩු මෙහෙයුමෙන්
ශ්රීලනිපය ඉවත් වෙලා
පසුගිය සතියේ ලොකු සංවාදයක් වැඩමුළුවේදී ඇති වූවත් ජාතික ආණ්ඩුවක් ගැන හෝ මහ මැතිවරණයක් ගැන නිශ්චිත අදහසක් ඇතිකර ගන්නට ශ්රීලනිපයට හැකිවූයේ නැතැයි කිවහොත් එය වැරදි නැත. ඒ නිසා පක්ෂයේ එක එක නායකයෝ පළ කළේ එක එක අදහස්ය. සමහරු මහින්ද නැතුව ඡන්ද කරන්න බැරි යෑයි එළිපිට කීහ. නිමල් සිරිපාල වැන්නෝ එවිට කියා සිටියේ ඇයි මහින්දම.... අගමැතිකමට මම හොඳ නැද්ද කියාය. මටත් ඒ සඳහා අයිතියක් තියෙන බව ඔහු කීවේය. මේ අයුරින් අගමැති අපේක්ෂකයා ගැන වාද විවාද යද්දී තවත් පිරිසක් මාන බලමින් සිටියේ රනිල්ගේ ආණ්ඩුවේ උප අගමැතිකමක් ගන්නටය. නිමල් සිරිපාල සිටියදී තවත් අයෙක් ඒ පිළිබඳ උනන්දුවෙන් කටයුතු කරන්නට වූයේ මේ අතර තිබූ ජාතික ආණ්ඩු සැලසුමට ද අරළු බුළු සපයමිනි.
ජාතික ආණ්ඩුව සෑදීම ගැන හෝ සභාගයක් ගැන හෝ අප්රේල් මාසයේ කරන ආණ්ඩු විසිරීමක් ගැන හෝ එක අදහසක් කොතනකවත් නොතිබිණි. පසුගිය සති අන්තය වන විට අවසාන නිගමනයක් වූයේ නැත. ජනාධිපති මෛත්රී කීවේ මහ මැතිවරණයෙන් පසුව හෝ ජාතික ආණ්ඩුවක් ගොඩනැගීම තම අභිප්රාය බවය. ජාතික ආණ්ඩුව ඒ අනුව පසුගිය සති අන්තය වන විටත් අපේ රටේ විවාදයට ලක්වුණු කරුණක්ව තිබිණි. පසුගිය සතිය ගෙවී ගියේ එලෙසය.
